കാഷ്യൂ കോർപ്പറേഷൻ ഫാക്ടറികളിൽ ബോണസ് വിതരണം ഇന്നുമുതൽ

കൊല്ലം | കാഷ്യൂ കോർപ്പറേഷൻ്റെ 30 ഫാക്ടറികളിലെ 11,000-ത്തോളം വരുന്ന തൊഴിലാളികൾക്കും ജീവനക്കാർക്കും ചൊവ്വാഴ്ചമുതൽ ബോണസ് വിതരണം ചെയ്യും. തൊഴിലാളികൾക്ക് 20 ശതമാനം ബോണസും 10,500 രൂപ അഡ്വാൻസും ലഭിക്കും. 540 ഫാക്ടറി സ്റ്റാഫിന് മൂന്നുമാസത്തെ ശമ്പളത്തിനു തുല്യമായി പരമാവധി തുകയായ 21,000 രൂപ ബോണസായി ലഭിക്കും. ബോണസിന് അർഹതയില്ലാത്ത ഓഫീസ് ജീവനക്കാർക്ക് 2,750 രൂപ ഉത്സവബത്തയും ഒരുമാസത്തെ ശമ്പളം അഡ്വാൻസായും ലഭിക്കും. രണ്ടുദിവസങ്ങളിലായി 13 കോടി രൂപ തൊഴിലാളികൾക്ക് വിതരണം ചെയ്യും.
വടംവലി, തിരുവാതിരക്കളി, നാടൻപാട്ട്, ഓണപ്പാട്ട്, പ്രച്ഛന്നവേഷ മത്സരം, കസേരകളി ഉൾപ്പെടെ വിവിധ കലാ-കായിക മത്സരങ്ങളും തൊഴിലാളികൾക്ക് ഓണസദ്യയും ഫാക്ടറികളിൽ സംഘടിപ്പിക്കുന്നുണ്ട്. കൊട്ടിയത്തെ കോർപ്പറേഷൻ ഫാക്ടറിയിലെ ഒരേക്കർ സ്ഥലത്ത് കൃഷിചെയ്ത ഏകദേശം രണ്ടുടൺ ബന്ദിപ്പൂവ് ഓണക്കാലത്ത് വിപണിയിൽ എത്തിക്കാൻ കഴിഞ്ഞു.
തൊഴിലാളികളുടെ തൊഴിൽദിനങ്ങൾ വർധിപ്പിക്കാനും കൂലി കൂട്ടാനും ബോണസ് വർധിപ്പിക്കുന്നത് ഉൾപ്പെടെ മാതൃകാപരമായ പ്രവർത്തനങ്ങൾ നടപ്പാക്കാനും കഴിഞ്ഞത് തൊഴിലാളികളുടെകൂടി സഹകരണംകൊണ്ടാണെന്ന് ചെയർമാൻ എസ്.ജയമോഹൻ പറഞ്ഞു.